Tranga samihafa

Fandikana fepetra amin’ny fitaterana Mpamily valo amby dimampolo nampidirina fonjakely

Nalain’ny polisy, avy eo nampidirina fonjakely avy hatrany, ireo mpamily sy mpamily mpanampy tamin’ny taksibe tratra tsy nanara-dalàna momba ny fepetra ara-pahasalamana tsy maintsy arahina amin’izao ady amin’ny valanaretina izao.  Mpamily sy ny mpanampy valo amby dimampolo no voasambotra teto an-drenivohitra, omaly hatramin’ny 9ora maraina. Valo amby roapolo kosa ny fiara nampidirina vala famonjana. Tsy nahazoana tatitra ireo voasazy, tamin’ny tapak’andro hariva.

Fampidirana fonjakely mandritra ny 48 ora, hatreto, no sazy ampiharina amin’ireo mpamily sy mpamily mpanampy tsy nanara-dalàna ireo. Tsy mbola voafaritra, hoy ny polisy, ny mety ho tohiny sy ny sazy hafa homena azy ireo. Misy tamin’ireo fiara ireo no nampiasa seza afovoany na « seza volamena » nefa efa voarara tsy azo ametrahana olona, amin’izao fisorohana ny Covid-19 izao. Ny sasany indray nitondra mpandeha tsy manao aron-tava sady tsy nampiasa tsiranoka mamono tsimok’aretina.

« Terena hanaraka ny fepetra rehetra, toy ny fampiasana tsiranoka mamono tsimok’aretina sy fanajana ny isan’ny mpandeha, ny mpamily ato aminay. Efa nisy ireo tratra teo aloha ary voasazy sy niakatra teny amin’ny Fitsarana mihitsy. Fay tamin’izany izy ireo ka tsy misy mandika lalàna intsony taty aoriana », hoy i Laborde Johachim Frederic, filoha lefitra ao amin’ny kaoperativa Volavita.

Milaza ny tompon’ andraikitra ao amina kaoperativa iray hafa eto an-drenivohitra fa tokony ho hendry sy hanara-dalàna hatrany ny mpitondra taksibe.