Fanatanjahantena

Paralympika Analamanga Tompondakan’ny fibatana fonjamby ireo atletan’ny Cosaph

Tontosa, tamin’ny sabotsy lasa teo, teny Mahamasina, ny fiadiana ny ho tompondakan’Analamanga amin’ny taranja fibatana fonjamby ho an’ireo atleta manana fahasembanana ara-batana. Ireo atleta avy ao amin’ny klioba Cosaph no nandray anjara tamin’izany.

Fifaninanam-paritra voalohany ho an’ny taranja fibatana fonjamby izy io. Voahosotra ho tompondakan’Analamanga eo amin’ny sedra “couché” Ranomenjanahary Sitrakiniaina Alban, rehefa nahazaka 160kg. Nahavita nibata 90kg kosa Rakotomahefa Jean Claude, tompondaka ho an’ny sokajy latsaky ny 60kg.
“Afaka mandray anjara amin’ny lalao iraisam-pirenena ireo atleta ireo raha ny zava-bitany androany. Najanona teo amin’ny 160kg kosa ny lanja farany ambony noho izy ireo vao manomboka amin’ny taranja”, hoy Rakotoarison Thomas, tale teknika nasionalin’ny Federasiona malagasin’ny fibatana fonjamby.

Nilaza Ranoromihaja Fabienne, filohan’ny ligin’Analamanga amin’ny taranja paralympika fa: “handray anjara amin’ny fiofanana any Dubaï ireo atleta ireo, amin’ny 10 hatramin’ny 17 marsa 2020 hoenti-manomana an’ireo fifaninanana hitrandrahana ny tapakila amin’ny Lalao Paralympika 2020”.