Fanatanjahantena

Kitra amboaran’ny CAF Nandresy ny TS Galaxy Afrika Atsimo

Manana tombony amin’ny herijika hiatrehana ny dingana manaraka amin’ny fiadiana ny amboaran’ny Kaonfederasiona afrikana amin’ny taranja baolina kitra (CAF) andiany faha-17, ny TS Galaxy, avy any Afrika Atsimo. Hifandona amin’ny Cnaps Sport, izay mpandresy amin’ireo ekipa roa ireo amin’ny fihodinana faharoa.

Niondrika teo anatrehan’izy ireo tamin’ny isa 1 noho 0 ny ekipan’ny Saint-Louis Suns, avy any Seychelles, nandritra ny lalao mandroso tamin’ny alahady lasa teo, tany Afrika Atsimo. Na izany aza anefa dia mbola tsy very fanantenana ny solontena seiseloa. Mbola hampiantrano ny lalao miverina amin’ny alahady 25 aogositra ho avy izao izy ireo ka miankina betsaka amin’ny vokatra eo ny tohin’ny fifaninanana ho an’ny Saint-Louis Suns.

Isan’ireo klioba voafidy tsy niatrika ny savaranonando na ny fihodinana voalohany ny Cnaps Sport, laharana faharoa teo amin’ny fiadiana ny amboaran’i Madagasikara. Ny Cnaps Sport no hanafika any an-tanin’olona amin’ny lalao mandroso, amin’ny 13 – 15 septambra ho avy izao. Amin’ny 27 – 29 septambra kosa no hampiantrano ny lalao miverina, izay vinavinaina hatao eny amin’ny kianjan’i Vontovorona, ny Cnaps Sport.