Samihafa

Hainahandro sy fikarakarana lakozia Hisy fampiofanana maimaimpoana momba ny fandrahoan-tsakafo etsy Andavamamba

Sehatra natokana ho an’ny hainahandro sy ny manodidina ny lakozia ny hetsika “Salon de la Gastronomie”, izay hotontosaina etsy amin’ny Alliance Française Andavamamba (AFT) amin’ny 27-29 septambra 2019. Mihoatra ny dimampolo ny isan’ny trano heva handravaka amin’io fampisehoana ara-tsakafo io amin’izao andiany fahaenina izao.

Matevina ny fandaharam-potoana mandritra ny telo andro hanaovana ny hetsika. Hisy ny varotra fampirantiana ireo karazan-tsakafo sy zava-pisotro ary kojakoja ilaina ao an-dakozia. Misongadina ihany koa ny fampianarana maimaimpoana momba fandrahoan-tsakafo sy ny fanamboarana mofomamy. Manampy ireo ny fampiofanana momba ny fanaingoana sakafo sy tsindrin-tsakafo amin’ny alalan’ny sôkôla, vatomamy… Hahazo tombony ireo mpitsidika ho avy eny an-toerana satria afaka manao andran-tsira amin’ireo karazan-tsakafo maro izy ireo.

Ankoatra izay, hisy ny kilalao sy fifaninanana isan-karazany mety hahazoana loka, toy ny tapalika hahafahana mividy entana mitentina roa hetsy ariary. Tsara ho fantatra fa hisy atrikasa arahina famelabelarana manodidina ny sakafo ho an’ireo liana te hiditra lalindalina amin’izany.