Tranga samihafa

Fakana an-keriny Vehivavy roa voatafika sady lasan’ny jiolahy

Notafihin’ny jiolahy am-polony ny tokantranona vehivavy iray tany Andranomiely-Ankazobe, tamin’ny faran’ny herinandro lasa teo. Sady nalain’ireo jiolahy ny vola dimy hetsy ariary no noentin’izy ireo nanaraka azy ilay vehivavy sy ny ankizivavy iray, 15 taona tao an-trano.

Mifanampy manaraka ny dian’ireo jiolahy nitsoaka ny mponina sy ny zandary any Ankazobe taorian’itsy tranga itsy. Tsy mbola nahazoam-baovao ireo mpaka an-keriny, hatramin’ny omaly. Tsy sahy mifandray amin’ireo fokonolona manara-dia ny havan’ireo olona roa lasan’ny jiolahy, araka ny loharanom-baovao avy any an-toerana.

Mizotra mankany amin’ny faritra Betsiboka ny dian’ireo jiolahy. Voalaza fa efa nampandrenesina hiandry kizo mety holalovan’ireo jiolahy ny mpitandro filaminana any amin’ny manodidina rehetra.