Sosialy

Sakanan ara-pahasalamana Nosokafana ny maraina tontolo ny lalam-pirenena fahafito

Mbola nisy ny fitaterana sy fifamezivezen’ny olona nivoaka sy niditra ny faritra Analamanga tamin’iny lalampirenena fahafito mampitohy an’Antananarivo sy Toliara iny, raha ny fanadihadiana natao omaly. Mpandeha avy any amin’ny faritra sy ny vao nanainga teto an-drenivohitra no nifanaretsaka teny amin’ny tobim-piantsonana Fasan’ ny karàna sy Ampasampito, omaly.

Nampahafantarin’ny minisitry ny Fitaterana, fizahantany ary ny famantarana ny toetrandro anefa ny fahataperan’ny fe-potoana ahafahan’ny fiara mpitatitra zotra nasionaly mivoaka sy miditra ny faritra Analamanga amin’ny alalan’ny taksibrosy, afak’ omaly. “Raha ny zava-misy tamin’ny maraina aloha dia tsy nisy mihitsy ny taksiborosy nandeha. Nony tonga anefa ny antoandro no nitombo isa ireo taksiborosy avy any amin’ny faritra sy niainga teto Antananarivo. Maro ny olona taraiky tokony hody ka tsy mbola nisy aloha ny fanakatonana ny fitaterana androany (Ndlr: omaly)”, hoy ny zandary niasa teny amin’ny lalam-pirenena fahafito.

Fikatonana fiantsonana

An-kilany, nikatona tanteraka ny teny amin’ny tobim-piantsonana Maki Andohatapenaka, omaly maraina. Ireo fiara mpitatitra entana sisa no afaka nifamezivezy.

“Omaly (Ndlr: alatsinainy), tamin’ny 6 ora hariva ny fiara farany niainga teto amin’ny tobim-piantsonana. Tsy nisy ny taksiborosy mitatitra olona ary tsy nisy mpandeha intsony androany”, hoy ny tale jeneraly lefitry ny tobim-piantsonana Maki Andohatapenaka, Ranaivoson Fidy. Nambaran’ny lehiben’ny Zandarimaria eto Analamanga, tamin’ny onjampeom-pirenena (RNM) omaly, fa “amin’ny 9 ora alina (Ndlr: omaly) no mikatona tanteraka ny fidiran’ny olona avy any amin’ny faritra eto Analamanga”.