Samihafa

BAOLINA KITRA – «CAN 2019» Tsy hisy ny fiaramanidina manokana ho an’ny Barean’i Madagasikara

Handeha amina sidina tsotra iarahana amin’ny besinimaro ny ekipam-pirenena malagasy taranja baolina kitra na ny Barean’i Mada- gasikara amin’ny lalao mandroso hotanterahina any Malabo, Guinée Equatoriale, amin’ny 13 oktobra ho avy izao. Mbola io sidina io ihany koa no hiverenan’izy ireo eto Antananarivo hamonjena ny lalao miverina.

“Niezaka ny nifandray tamin’ny mpitondra ny firenena izahay. Nanao izay fomba rehetra ihany koa hahazoana sidina manokana amin’ny Air Madagascar saingy nilaza ity farany fa tsy afaka ny hanao izany. Tsy nisy nahafa-po ny valin-teny rehetra”, araka ny nambaran’ i Doda Andriamiasasoa, filohan’ny Federasiona malagasin’ny baolina kitra, mpisolo toerana, teny Isoraka, omaly, nandritra ny resaka tamin’ ny mpanao gazety.

Efa nisy ihany koa ny fotoana nifampiresahana tamin’ny ekipan’i Guinée Equatoriale mba hiraisana fiaramanidina amin’izy ireo, saingy ny vola
50 000 dôlara, izay nidina ho 45 000 dôlara, no tsy hita indray. Tsy nisy hatramin’izao fanamafisana ny handoavana na tsia an’io vola io avy amin’ny governemanta malagasy. Noho izany dia nanapa-kevitra izahay ny hamandrika toerana amina sidina iarahana amin’ny besinimaro sao dia sady tsy an’ny atsy no tsy an’ny aroa eo”, hoy izy.

Ho avy any Guinée Equatoriale amin’ny talata 9 oktobra ho avy izao ireo mpilalao mpila ravinahitra, raha ny ampitson’io kosa vao tonga ny mpilalao avy eto an-toerana. Ny alahady 14 oktobra indray izy ireo no hiala any ka hijanona alina iray ao Nairobi, mialoha ny hahatongavana eto Madagasikara amin’ ny alatsinainy 15 oktobra. “Tafakatra hatramin’ny 15 000 dôlara ny fandaniana amin’izany. Nifampiresaka tamin’ny tompon’andraikitra ambony tao amin’ny Fifa izahay ary nanamafy izy ireo fa handray an-tanana ny fandaniana “, hoy hatrany i Doda Andriamiasasoa.