Sosialy

“VILLAGE VOARA” Miandry fandaminana ny fifindran’ireo tra-boina

Misy lafiny sy pitsopitsony maro no fantatra fa mbola tsy hahafahan’ireo mponin’Ampamarinana izay niala tamin’ny tranony, nanomboka ny alatsinainy lasa teo, mifindra eny amin’ny toerana natokana ho azy ireo eny amin’ny tanàna Voara Andohantapenaka. “Mbola tsy tomombana satria hasiana fanamboarana ny lafiny sasany, toy ny toeram-pidiovana, ny jiro manazava, ny fotoana handraofan’ny fiarabe ny fako sy ny maro hafa alohan’ny hipetrahan’izy ireo eny an-toerana. Jerena avokoa ny fepetra hahafahan’izy ireo mitoetra milamina amin’ireny toerana ireny”, hoy ny tompon’ andaikitra iray eo anivon’ny Birao nasionaly misahana ny loza voajanahary na ny Bngrc, omaly.

Nanomboka nanatanteraka ny fidinana ifotony tamin’ ireo toerana voalaza fa handraisana ireo tra-boina io birao io. Fianakaviana manodidina ny sivy amby efapolo no voafaritra fa zakan’ny eny amin’ny tanàna Voara. “Hisy sivana ny fampidirana azy ireo ka ireo olona tena sahirana no horaisina voalohany”, hoy ny fanampim-panazavana.
Etsy amin’ny INFP Mahamasina sy ao amin’ny kianja mitafo Mahamasina ihany aloha no hitoeran’ireo tra-boina vonjimaika hatramin’ny fotoana hanaterana azy ireo sy hitsinjarana azy amin’ ny toerana misy azy avy. Etsy an-danin’ izany, nisy ny fihaonana teo amin’ny tompon’andraikitry ny Vokovoko Mena malagasy sy ny Bngrc, omaly . Ny Vokovoko Mena no isan’ireo komity mandray an-tanana ireo tra-boina. Nanolotra tranolay miisa folo izy ireo teny Mahamasina, omaly.