Samihafa

TARATASY FAHAZOAN-DALANA MAMILY Hihemotra indray ny fe-potoana amin’ny fanovana ho biômetrika

Tsy tratra indray ny fe-potoana. Hihemotra ao anatin’ ny fotoana tsy voafetra ny fe-potoana hamadihana ny taratasy fahazoan-dalana mamily fiara sy ny taratasin’ny fiara na «carte grise» ho biômetrika.

Araka ny tetiandron’ny Sampan-draharaha misahana ny fanomezana taratasy fahazoan-dalan’ny fiara na ny CIM dia ny sabotsy lasa teo no tokony ho nifarana izany. Mbola ny enimpolo isan-jaton’ny mpamily ihany hatreto no nahavita ny fanovàna ireo antontan-taratasy ireo. Ny any amin’ny faritra, araka ny tatitry ny minisiteran’ny Atitany no tena betsaka tsy nahavita nanova izany ho biômetrika.

Marihina fa efa inefatra nahemotra ity daty ity. Mbola manana fotoana izay rehetra tsy nahavita namadika ho biômetrika ny taratasy fahazoan-dalana mitondra fiara, hamadihana izany. Hialana amin’ny hosoka sy fisandohana no antony hanovana ireo taratasy ireo ho biômetrika, araka ny fanazavana hatrany.